Një debat interesant është zhvilluar në mes dy “ujqve të vjetër” të politikës botërore në Ballkan, ekspertit amerikan, Daniel Serwer, dhe ambasadorit austriak dhe ish-përfaqësuesit special të BE-së për Ballkan, Wolfgang Petritsch, njofton Express.

Ndërsa Serwer në një shkrim para disa ditësh ka kundërshtuar ashpër idetë për shkëmbime etnike të territoreve në mes Serbisë dhe Kosovës, ambasadori Petritsch ka befasuar me një koment që ka postuar në faqen e Serwerit, duke bërë të ditur se ka njohuri të thellë për marrëveshjen që po negociohet në mes të presidentit Thaçi dhe atij Vuçiq.

Kështu Petritsch i thotë Serwerit se “nëse ka korrigjime të kufijve, ato do të jenë të vogla dhe kozmetike, që afektojnë një numër të vogël fshatrash në Bujanoc dhe Mitrovicë. Kjo nuk do ta ndryshojë përbërjen etnike të asnjërit shtet dhe nuk do të ketë pasoja zinxhir”. Më tutje Petritsch e lavdëron Serwerin duke i thënë se “analiza jote është e shkëlqyer, por se ka ardhur koha”, për siç thotë ambasadori i njohur austriak, “realizimin e ri në Ballkan”.

Sipas Petritschit, rreziku i vërtetë në Ballkan vjen nga ndikimi rus dhe hungarez në pasazhin medial, aventurat neo-otomane të liderit boshnjak Bakir Izetbegovic, pastaj investimet arabe në Serbi dhe Bosnje si dhe mbi të gjitha “zgjerimi i shpejtë i ndikimit kinez në Evropën Juglindore”. Petritschi thotë se formati kinez “Evropa Lindore + 1” dhe “Rruga e Mëndafshtë” që po promovohet nga Kina janë sfidat e vërteta për Ballkan dhe BE. Prandaj Petritsch thërret përkrahje për “linjën e marrëveshjes Thaçi-Vuçiq”.

Ai shton se është “I vetëdijshëm me dhembje të thellë për dëshpërim” por se “kohërat janë duke ndryshuar”.

Veritas.com.al/