Porosia e Edi Ramës se pas 11 majit duhet të fillojë puna për ndryshimin e drejtësisë, në emër të përmirësimit të standardeve, nuk ishte harruar nga socialistët. Në tryezën e dytë të nivelit të lartë të organizuar nga komisioni i posaçëm parlamentar për anti-korrupsionin, u tha qartë se pas zgjedhjeve parlamentare, do të prezantohet plani për ndërhyrjet në ligjet e reformës në drejtësi.

“Nuk mund të kuptohet sundimi i ligjit pa drejtësinë dhe institucionet e saj. Gjykuam më të arsyeshme që prezantimin e planit analitik dhe sidomos procesin e konsultimit ta zhvillonim pas zgjedhjeve duke shpresuar për një klimë më të qetë politike”, tha Xhafaj.

Të pranishëm në këtë aktivitet ishin edhe zyrtarë nga Brukseli dhe Strasburgu, si zëvendës sekretari i KiE-së apo Drejtoresha për Ballkanin Perëndimor në Komisionin Europian. Prezenca e tyre duket se bëri Kryeministrin të mos ndjehet i braktisur nga partnerët ndërkombëtarë në këtë iniciativë dhe një mesazh pati për të tjerët që vijojnë të refuzojnë këtë komision parlamentar.

“Dua t’i falenderoj të gjithë ata që na u gjendën, se këtë nuk e përkthen dot përkthyese, që na u gjendën në këtë ditë të ngatërruar sa gati gati nuk na vunë me shpatulla pas muri si një grup subversiv që u krijua për të vrarë fëmijën që pollën vetë. Tani e kuptojnë që është krejt e kundërta, dhe kush nuk na besoj e ka të vështirë që të jetë prezent sot, por do të vijë, s’ka ku të shkojë”, u shpreh Rama.

Si për të dhënë garanci për këtë proces u kujdes të nënvizonte se nuk bëhet në zyrat e qeverisë por në parlament.

“Nuk mund të jetë kjo hapësirë ndërveprimi një hapësirë që e krijon qeveria. u vërtetua nga koha që komisioni krijoji një momentum angazhimi gjithëpërfshirës shumë përtej mureve të institucioneve”, theksoi kryeministri.

Ky komision sipas Ramës do ta afrojë edhe më shumë vendin me Bashkimin Europian, shprehje e cila duket se ka krijuar inflacion në artikulimin e kreut të qeverisë.

“Myslimanët i falen Allahut 5 herë, ne i falemi BE-së më shumë se 5 herë në ditë”.

Komisioni i posaçëm anti-korrupsion, drejtuar nga socialisti Fatmir Xhafaj, është refuzuar nga opozita që nuk merr pjesë në të, ndërsa institucionet e drejtësisë në vend nuk kanë pranuar të dërgojnë përfaqësuesit e tyre. (A2 Televizion)