Kryeministri Rama me kryetarët e bashkive, kundër korrupsionit: 'Në mandatin e 3 vija e kuqe do skuqet deri në përvëlim”/

Kryeministri Edi Rama nuk i ka kursyer kritikat për kryebashkiakët, ndërsa i ka dhënë urdhër që të bëhet regjistrimi imediat i tokës bujqësore.

Ai shtoi se bashkitë pavarësisht pretendimeve që nxjerrin i kanë të gjitha mjetet dhe kushtet për të bërë të mundur regjistrimin, por nuk e bëjnë për arsye neglizhence.

Teksa i ka thënë “boll më kësaj historie”, Rama paralajmëroi se bashkitë që nuk do të kenë performancë të mirë nuk do të marrin më fonde.

“Ju jeni shokë, shoqe dhe miq të mijtë, por vija ndarëse mes miqësisë dhe partisë sonë nga njëra anë dhe shfaqjeve dhe akteve abuzive që secili nga ne ka marrë nga populli do vijë duke u bërë gjithnjë e më e kuqe dhe do të skuqet deri në përvëlim gjatë gjithë mandatit të tretë.

Duhet ndryshim imediat të kursit qeverisës në lidhje me regjistrimin e tokës bujqësore. Unë dhe PS nuk do pranojmë më të marrim asnjë kosto publike për zvarritjen e këtij procesi.

Del edhe tepron mirëkuptimi që keni pasur deri sot dhe justifikimi që i kemi bërë jo pa të drejtë, por që tani është e patolerueshme. Janë bërë të gjitha ato që mund të bëheshin dhe duhet të punojmë që regjistrimi i tokës bujqësore të përfundojë brenda mandatit të tretë. Kjo është një sfidë që ne kemi punuar e organizuar dy mandate rresht. Ligji i ri i ka thjeshtuar procedurat sepse të gjitha dokumentet kanë kaluar në Kadastër.

Për një ekonomi që nuk mund të zhvillohet me gjithë forcën e mundshme për shkak të mungesës së titujve të pronësisë që pengojnë transaksionet, për të mos thënë të tjera. Argumentet që nxirrni ju janë sa të çuditshëm aq edhe të papranueshëm më.

Dëgjoni këtu! Kemi bërë reforma administrative dhe një pjesë e madhe bashkive kanë më shumë njerëz sesa kur kishim 300 e kusur komuna. Dhe janë kthyer bashkitë në hapësira për indulgjenca si gjithmonë për fat të keq. Është bërë dhe siç qeveria ka bërë të kundërtën duke i përdorur fondet për pensione në moshë të re, që do të thotë fut në punë, jep një rrogë dhe u kry, pa asnjë sens financiar.

Njerëzit dhe mjetet i keni aty. Por kur ke mjetet që i sjell qeveria për të pastruar kanalet dhe bën tendera patjetër që nuk dalin lekët, nuk funksionon dhe përfundon në burg. Lushnjës dhe Divjakës qeveria i ka dhënë mjete. Në të gjithë Fierin nuk ka një bllokim apo komunitet që thotë s’ma pastroni pa tendera. Në Lushnjë as kanalet nuk janë të gjitha të pastra dhe kryetari është në burg se do bënte tendera. Si i ka bërë nuk është çështja ime, por e kam fjalën kur do ta bësh, ose s’do ta bësh punën.

Nuk do ketë më fonde pa performancë. Bashkitë që do të performojnë do të marrin fonde, ndërsa bashkitë që nuk performojnë të shkojnë dhe të përgjigjen para popullit”, deklaroi Rama.

VERITAS.COM.AL