Sarkazëm nga: Agim Xhafka/

Mbaj mend kur blemë televizorin e parë babai shtroi një darkë. U mblodhën xhaxhallarët me fëmijët e tyre,kushërinj nga fshati e qyteti dhe u kënaqëm me kongresin e 8 të Partisë së Punës. Foli dhe vetë udhëheqësi. Pihej raki e duartrokitej. Ne,të rinjve, na shkonte sumbulla nga Jugosllavi,por babai shkelte buzën e prapë tek Enveri.

Nëna kishte bërë një centro me grepa dhe e kishte vënë mbi tv që një cep t’i binte mbi ekran.

-Si u duket?- pyeste grarinë.

Ne e ngrinim cepin se na pengonte. Por prapë binte që binte. Nëna sërish pyeste:

-Nuk më thatë një fjalë për centron.

Por Enveri ngrinte zërin e çakërqejf njerëzit duartrokisnin edhe kot.

Kjo histori mu kujtua kur Lali Eri inaguroi pazarin e ri. Me aq bujë e pompë. Vetë kryeministri e sajdisi në këtë projekt lokal. Dhe kur e krahasova, për shembull, me Rrugën e Kombit, m’u duk si pyetja e mamasë.

Pazari ishte tamam centro, se TV ishte Rruga e Kombit. Kaq.

/Veritas.com.al/