Kryeministri Edi Rama, në fjalën e tij në seancën plenare në Kuvend, tha se qytetarët kanë treguar mbështetje më shumë se kurrë për partinë që përfaqëson. Kreu i qeverisë iu drejtua deputetëve opozitarë duke thënë se nuk duhet të flasin në emër të shqiptarëve pasi ata folën me 14 Maj.

“Jam i impresionuar nga kurajoja e parafolësve për ta adresuar parlamentin në emër të shqiptarëve. Në emër të tyre flasin shqiptarët dhe ata të cilët i mandatojnë për të folur. Por kur shqiptarët sapo kanë folur, nuk është bërë akoma java e dytë. Kanë folur aq qartë sa natyrisht kanë tronditur një pjesë të atyre që fatkeqësisht janë ata që nuk duan të dëgjojnë është shumë komike që të flitet në emër të tyre. Flitet në emër të shqiptarëve që braktisën politikën, zgjedhjet, apo në emër të të rinjve që ishin të pakët në votime por pasqyra e pjesëmarjes flet pak më ndryshe. Shqiptarët nuk kanë braktisur të gjithë ne por një pjesë nga ne. Sa i takon pjesës që së bashku me të gjithë deputetët që përfaqësoj, nuk na kanë braktisur por na kanë mbështetur më shumë se asnjëherë më parë dhe kjo bëhet edhe më e rëndësishme po të kemi parasysh se nuk është një fenomen karakteristik i zgjedhjeve vendore.”, tha Rama.

Kreu i qeverisë komentoi gjithashtu edhe rritjen e pagave duke thënë se kur erdhi në pushtet Shqipëria renditej e fundit në rajon sa i përket pagës mesatare.

“Ne do të vazhdojmë vetëm përpara dhe sot kam shumë i lehtësuar sepse vijnë për të kaluar një projekt, të cilin kemi dashur ta kalojmë vite më parë. Për të cilin kemi luftuar çdo ditë të këtyre viteve. E kemi marrë këtë vend kur tabela e klasifikimit ishte si vijon: 259 euro paga mesatare, ndërkohë që Kosova e kishte 444, Maqedonia e Veriut 504, Serbia 537 dhe Mali i Zi 726 euro. Kemi qenë të fundit me diferencë. Sot tabela është si vijon: Kosova 504 euro, Maqedonia 705, Serbia 763, Bosnja e Hercegovina 890 dhe Mal i Zi 792 euro dhe me votimin e sotëm i hapim rrugë një procesi që në harkun e këtij viti që vjen na çon në 900 euro. Me këtë parashikim ne ngjitemi në rritjen më të lartë të rajonit.”, shtoi Rama.