HAGË- Kryeministri i vendit, Edi Rama, gjatë  pjesëmarrjes në Samitin e NATO-s, është takuar me shefin e Aleancës së Atlantikut të Veriut, Mark Rutte. Shefi i qeverisë shqiptare ka zbardhur pjesë nga biseda, që ka zhvilluar me Rutte.

Ai thekson se kanë biseduar për  angazhimet e Samitit, Ballkanin Perëndimor, investimin madhor për Portin e Ri të Durrësit, ku NATO do të angazhohet për terminalin ushtarak, e po ashtu edhe për përgatitjet e Samitit 2027 në Tiranë.

“Kënaqësi të takoja Sekretarin e Përgjithshëm të NATO-s dhe mikun e çmuar, Mark Rutte, me të cilin folëm për angazhimet e Samitit, Ballkanin Perëndimor, investimin madhor për Portin e Ri të Durrësit, ku NATO do të angazhohet për terminalin ushtarak, e po ashtu edhe për përgatitjet e Samitit 2027 në Tiranë.”, shkruan Rama.

Pak ditë më parë, Rama në komunikim live me qytetarët në rrjetin e tij social “Facebook” konfirmoi se kishin nisur përgatitjet për mbajtjen e Samitit të NATO-s në Shqipëri.

“Kemi filluar punën për Samitin e NATO-s, në dukje ka kohë, por në fakt kjo është mënyra si punohet për samitet e NATO-a, fillon puna dy vjet përpara. Pasi ka ardhur grupi i inspektimit nga qendra e NATO-s në Bruksel për të parë të gjitha opsionet dhe për të inventarizuar të gjitha kushtet dhe mundësitë e infrastrukturës së mikpritjes, logjistikës, topi është në fushën tonë për të shkuar përsëri në qendër me një masterplan të përgjithshëm të organizimit”, shprehej Rama.