Kostas Simitis, një figurë kyçe në politikën moderne greke dhe ish-kryeministër, u nda nga jeta në orët e para të së dielës në moshën 88-vjeçare.

Sipas drejtorit të spitalit të Korinthit, Grigoris Karpouzis, Simitis u transportua nga vila e tij në Agii Theodori drejt spitalit rreth orës 07:30, pa puls. Vdekja e tij u konfirmua pas mbërritjes në spital, ndërsa mediat fqinje raportojnë se ish-kryeministri pësoi atak kardiak.

Simitis la pas një trashëgimi të thellë politike, pasi ka shërbyer si një lider transformues gjatë një periudhe reformash të rëndësishme dhe integrimit evropian për Greqinë.

Vizioni dhe lidershipi i Simitis

Kostas Simitis, profesor universiteti dhe politikan, ishte një nga personalitetet më të shquara të skenës politike moderne greke. Ai ishte president i PASOK (30 qershor 1996 – 8 shkurt 2004) dhe kryeministër i Greqisë (18 janar 1996 – 10 mars 2004), duke lënë gjurmë në një epokë reformash të rëndësishme.

Pas rënies së Juntës në 1974, Simitis ishte një nga anëtarët themelues të Lëvizjes Socialiste Panhelene (PASOK). Gjatë karrierës së tij politike ka mbajtur shumë poste ministrore, duke kontribuar aktivisht në konsolidimin e partisë në pushtet.

Karriera e tij arriti kulmin më 18 janar 1996, kur pasoi Andreas Papandreun si kryeministër, pas votimit të Grupit Parlamentar të PASOK-ut. Duke përfaqësuar polin modernizues, ai u fokusua në reformën ekonomike dhe konvergjencën evropiane të Greqisë. Pak më vonë, më 30 qershor 1996, ai u zgjodh kryetar i PASOK-ut në Kongresin e IV-të të partisë.

Gjatë mandatit të tij, Simitis promovoi masa të stabilitetit ekonomik dhe një politikë të jashtme të moderuar. Privatizimi gradual i sektorit publik dhe hyrja e Greqisë në Bashkimin Ekonomik dhe Monetar në 2001 ishin dy nga arritjet e tij më të dukshme.

Mandati i tij i dytë u karakterizua nga masa shtrënguese që synonin uljen e inflacionit dhe borxhit kombëtar, si dhe përpjekjet për të zgjidhur mosmarrëveshjet me Turqinë dhe problemin e Qipros.

Si president i PASOK-ut, Simitis theksoi integrimin evropian dhe përshtatjen e Greqisë ndaj sfidave të globalizimit. Deradikalizimi i diskursit politik të partisë ishte i lidhur me përpjekjen për ta përafruar vendin me standardet e Bashkimit Evropian.

Pavarësisht reagimeve të shkaktuara nga politikat e tij, Kostas Simitis njihet për kontributin e tij vendimtar në formimin e Greqisë moderne.