Countdown-i  për PD ka filluar.

E hëna e 6 dhjetorit shënon nisjen e javës së Kuvendeve për Partinë Demokratike, e cila dhe pse nuk i ka fituar zgjedhjet që nga viti 2013, do të mbajë dy Kuvende të ashtuquajtura “Kombëtare”.

Atë të thirrur nga Sali Berisha më 11 dhjetor dhe Lulzim Basha më 18 dhjetor.

Lulzim Basha do ta mbledhë Kuvendin në cilësinë e liderit të selisë blusë, por edhe Berisha gjatë gjithë foltoreve të mbajtura, nuk e ka mohuar “rikthimin si lider i PD-së”.

Gjatë javëve të fundit ndërkaq, gjuha ndaj njëri-tjetrit është bërë më e ashpër. Akuzat dhe kundërakuzat kanë vijuar nga të dyja palët.

Stadiumi “Air Albania” në Tiranë duket se do të presë delegatët e Partisë Demokratike të thirrur nga ish-lideri i saj, Sali Berisha në ditën e themelimit të PD-së.

Nga foltorja e mbajtur në Bilisht, ky i fundit theksoi se, “me numrin e shumtë të firmëtarëve ‘Air Albania’ është mundësia e vetme serioze”.

Kjo mundësi serioze – sot – për Berishën dikur ishte “shkarravina e vetë Edi Ramës”, kryeministrit të Shqipërisë.

Asokohe, ish-lideri i selisë blu aludonte se vet Rama ka bërë projektin e stadiumit dhe jo ndonjë arkitekt.

Për më tepër, ai e cilësoi Arenën Kombëtare si “Arena e Hajnisë”.

“Kulla, Kristaq Rama dhe Molli familjar i klanit Mafioz Rama gllabërojnë 50% të fondeve të asaj që nisi si Arenë Kombëtare dhe përfundoi si aneks i pronave të Edvin Hajdutit dhe Klanit të tij mafioz!”, shkruante Berisha në denoncimet si qytetari digjital.

Nga objekt sulmi, “Air Albania” u kthye për Berishën ne mikpritësen e delegatëve.

Fillimisht, ky Kuvend i 11 dhjetorit u planifikua në Pallatin e Kongreseve.

Por për të treguar “dhëmbët” Sali Berisha bëri me dije se Kuvendi mund të mbahet në stadium, duke parë gjithmonë kushtet e motit.

Agjenda e Kuvendit të parë

Nga selitë blu të çdo dege janë lexuar emrat e delegatëve që kanë firmosur për mbajtjen e Kuvendit.

Verifikimi i mandateve të tyre do të bëhet me 11 dhjetor.

Të gjithë këto delegatë, do të pajisen më një karte, e cila do të ketë një barkod sigurie.

Kjo e fundit do të tregojë të dhënat si emri, mbiemri dhe posti që ka në PD.

Siç është përsëritur shpesh nga Berisha në foltoret e tij gjatë këtyre muajve ata do të miratojnë disa ndryshime që “detyrojnë kryetarin të dorëhiqet në rast se humb zgjedhjet e përgjithshme”.

Kjo duke çuar në një mocion mosbesimi për shkarkimin e Lulzim Bashës.

Të gjitha këto – të pa prezantuara zyrtarisht.

Si u ndërmor nisma ‘statutore’

Replikat midis Bashës dhe Berishës kanë filluar që prej muajit shtator.

Kryetari aktual e përjashtoi nga Grupi Parlamentar Berishën më 9 shtator. Pas kësaj do të niste një lëvizje brenda demokratëve, të cilën Berisha do ta cilësonte fillimisht si “statutore”.

Më pas, ai ndërmori një seri foltoresh, derisa arriti në dorëzimin e 4 mijë e 200 firmave, për mbledhjen e Kuvendit Kombëtar të PD-së, me qëllim rrëzimin e vendimit të Bashës për ta përjashtuar atë nga partia.

Kjo javë, me shumë mundësi, do të ndikojë në të gjithë skenën politike.