Gjykata Kushtetuese e Shqipërisë ka kaluar zyrtarisht për shqyrtim kërkesën e Kuvendit për shkarkimin e Presidentit Ilir Meta nga posti i tij, nën pretendimet e “shkeljeve të rënda të Kushtetutës”.

Kalimi i çështjes do të jetë për shqyrtim në një seancë plenare publike, data e së cilës do të shpallet më pas.

Vendimi është miratuar në Parlament më 9 qershor 2021. Më pas, më datë 14 qershor, vendimi i është dërguar Kushtetueses.

Ky vendim i organit më të lartë në drejtësinë shqiptare, vjen ekzaktësisht pesë muaj pas kërkesës së Kuvendit.