“Andaj, njoftojmë qytetarët dhe bashkatdhetarët tani se pikë kalimi kufitar “Merdare”, është liruar për qarkullim dhe i është kthyer normalitetit të plotë”, thuhet në komunikatë.

Më 27 dhjetor, pika kufitare në Merdare u mbyll nga Policia e Kosovës pasi një grup serbësh në Serbi kishin bllokuar rrugën për në kufi.

Edhe nga Qendra Kombëtare për Menaxhim Kufitar është konfirmuar lajmi.

“Pasi që janë larguar barikadat e vendosura me datë: 27.12.2022, në kilometrin e dytë nga Pikë Kalimi Kufitar “Merdare” në brendësi të territorit të Republikës së Serbisë, njoftojmë qytetarët dhe bashkatdhetarët tanë, se Pikë Kalimi Kufitar “Merdare”, është liruar për qarkullim është kthyer në normalitetit të plotë”, thuhet në njoftimin e kësaj qendre.

Të enjten është paralajmëruar edhe largimi i barrikadave nga rrugët e pjesës veriore të Kosovës.

Lajmi për largimin e barrikadave është bërë i ditur më 28 dhjetor, pasi presidenti i Serbisë, Aleksandar Vuçiç takoi përfaqësuesit e serbëve të Kosovës.

Për mbi 20 ditë 16 barrikada në veri të Kosovës bllokuan akse nyje të lidhjes mes Kosovës dhe Serbisë.

Lirimi i Dejan Pantiç dhe dërgimi i tij në arrest shtëpie si masë e zbutur nga ajo e paraburgimit, ishte edhe ngjarja e ditës, e cila e parapriu vendimin e Vuçiçit për të larguar barrikadat.

Nga Rashka, ku zhvilloi takim me përfaqësuesit politik të serbëve të Kosovës, ai tha se tashmë i kanë të gjitha garancitë që kanë kërkuar, derisa për cilësimin e barrikadave si mjet paqësor nga ndërkombëtarët tha se ka bërë “luftë gjithë natën”.

Gjithashtu, Vuçiç përmendi edhe faktin se kanë siguruar lirimin e Dejan Pantiç-it dhe se shkuarja e tij në shtëpi te familja “përbën fitore simbolike”.

Kjo krizë kishte bllokuar edhe dialogun në Bruksel, i cili u duk se po futej në një fazë përfundimtare me propozimin franko-gjerman.

Në Veri, forca patrulluese ka qenë KFOR-i, derisa policia e Kosovës nuk kishte mundësi të lëvizë vetë në vende të ndryshme pa asistencën e KFOR-it.

Për pasojë edhe një grup policësh mbetën të bllokuar në pikat kufitare në Veri për 14 ditë, derisa KFOR dhe EULEX ndihmuan zëvendësimin e tyre.