Ambasada e Shteteve të Bashkuara në Tiranë ka reaguar qartë dhe prerë ndaj vendimeve të Partisë Demokratike dhe Lëvizjes Socialiste për Integrim për të djegur mandatet e deputetëve.

Ambasada e SHBA i bën thirrje deputetëve të refuzojnë thirrjet për të braktisur mandatet

Në një reagim në faqen zyrtare Ambasada e SHBA nënvizon se “kërcënimet” dhe “presionet” nga LSI dhe PD “ minojnë parimet bazë të demokracisë dhe sabotojnë përparimin e rëndësishëm që Shqipëria ka arritur në zbatimin e ligjit dhe qeverisjen e përgjegjshme”.

REAGIMI I PLOTË i AMBASADËS:

“Një demokraci e shëndetshme kërkon një opozitë që funksionon në mënyrë konstruktive brenda institucioneve kushtetuese. Kërcënimet nga Partia Demokratike, Lëvizja Socialiste për Integrim dhe parti të tjera opozitare për të braktisur mandatet e tyre në parlament minojnë parimet bazë të demokracisë dhe sabotojnë përparimin e rëndësishëm që Shqipëria ka arritur në zbatimin e ligjit dhe qeverisjen e përgjegjshme.

Shtetet e Bashkuara iu bëjnë thirrje të gjithë deputetëve të ngrihen mbi sherret politike, të refuzojnë thirrjet për të braktisur mandatet e tyre dhe të mbrojnë idealet dhe parimet që janë me rëndësi thelbësore për çdo demokraci të fortë.

Nëse dështoni të bëni punën tuaj, do të zhgënjeni njerëzit të cilëve keni privilegjin tu shërbeni!”.

Veritas.com.al/