Një tragjedi e rëndë familjare ka tronditur Romën, ku një çift dhe vajza e tyre 5-vjeçare u gjetën të pajetë në banesën e tyre në zonën e Pietralatës, në periferi të kryeqytetit italian.

Ngjarja u zbulua rreth mesditës së së hënës, më 31 gusht, pasi familjarët e Luca Abbassiano, 42 vjeç, dhe Valentina Pambianco, 41 vjeç, nuk kishin mundur t’i kontaktonin për disa orë.

Policia dhe zjarrfikësit ndërhynë rreth orës 13:00 dhe, pasi hapën me forcë derën e banesës, gjetën trupat e tre anëtarëve të familjes në shtrat.

Sipas autoriteteve, të tre kishin plagë të shkaktuara nga armë zjarri. Hetimet paraprake po e trajtojnë ngjarjen si një rast vrasjeje të vajzës së mitur, e ndjekur nga vetëvrasja e dy prindërve.

Pranë trupave u gjetën disa letra të lëna për familjarët dhe njerëzit e afërt. Në to kishte kërkimfalje, shpjegime dhe udhëzime për të ardhmen. Në një prej letrave, Luca i kërkonte motrës së tij, e cila kishte ngritur alarmin për mungesën e kontaktit me familjen, që të kujdesej për babanë.

Në një tjetër mesazh, çifti kishte shkruar: “Nuk mund ta bëjmë këtë vetëm.”

Bianca kishte lindur para kohe në vitin 2021 dhe, sipas raportimeve të mediave italiane, ishte me aftësi të kufizuara dhe probleme të shumta shëndetësore.

Fqinjët kanë treguar se prindërit e donin shumë vajzën, por gjendja e saj shëndetësore kishte ndikuar rëndë në jetën e familjes.

“E donin shumë këtë vajzë të vogël, por ajo lindi me shumë probleme. Ata kishin frikë se nuk do të jetonte gjatë dhe e gjithë kjo po i lodhte shumë”, tha një fqinje.