SHQIPËRI- Shërbimet të nxitura nga turizmi kanë rezultuar një ndër shtyllat kryesore për ekonominë shqiptare.

Sipas të dhënave të Instat për tre muajt e fundit të vitit 2024 rezulton se shërbimet kanë pësuar një rritje në të gjithë treguesit.

Tregtia me pakicë e shumicë ka regjistruar një shtim të shitjeve me gati 4%.

Po ashtu Rezulton se në aktivitetin Hotele, në tremujorin e katërt 2024, Indeksi i shitjeve shënoi rritje 7,9 %, krahasuar me tremujorin e katërt 2023 ndërsa numri i të punësuarve u shtua me 8,8 %.

Fluksi I turistëve ka nxitur gjithashtu edhe aktivitetin në bare e restorante  ku tremujorin e fundit të vitit të kaluar indeksi i shitjeve shënoi rritje 12,8 %, krahasuar me një vit më parë.

Po ashtu në këtë sektor ka pasur edhe më shumë të punësuar si dhe rritje pagash.

Edhe aktiviteti i agjencive të udhëtimi  ka qenë  optimist duke pasur një rritje të shitjeve  me 7,1 %.

Me rritje më të lehtë  me 2.7% ka rezultuar edhe sektori  i ndërtimit krahasuar me të njëjtën periudhë të një viti më pare.

Ndërsa indekset e treguesve në aktivitetin Industri, në tremujorin e katërt 2024, shënoi rënie 14,4 %, krahasuar me vitin 2023.