Veliaj kërkon lirinë, shtyhet seanca/ Vendimi për kryebashkiakun jepet të enjten

Apeli i GJKKO-së nuk ka dhënë as sot vendimin lidhur me masën e sigurisë ndaj Kryebashkiakut Eriuon Veliaj.

Gjyqtari Engert Pëllumbi do të japë vendimin në orën 10:00 të së enjtes

Seanca e sotme në Apelin e GJKKO-së nisi rreth orës 12:40, ku në nisje të saj, avokati i Kryebashkiakut Erion Veliaj, Artur Selmani, ka paraqitur qëndrimin e tij mbi provat e reja që ka paraqitur SPAK. Të pranishëm në seancë ishin edhe dy prokurorët Ols Dado dhe Altin Dumani.

Sipas raportimeve, duke marrë fjalën në seancën gjyqësore, Kryebashkiaku Veliaj ka kërkuar që seanca të bëhet e hapur për mediat që të deklarojë publikisht përgjimet që ai pretendon se janë bërë ndaj tij gjatë kohës së qëndrimit në paraburgimin e Durrësit.

Veliaj ka kundërshtuar pretendimet e prokurorëve. Sipas burimeve, Veliaj ka deklaruar se nuk ka asnjë sekret në bisedat e telefonike me familjarët e mi nga kabina burgut.

Veliaj thotë se është mbajtur për një muaj në izolim që të gjendet provat e reja, ndërsa sjell në vëmendje edhe deklaratat e Sali Berishës i cili ka kërcënuar hapur SPAK e prokurorët, duke i quajtur organizatë kriminale. “Por çfarë i ndodhi Saliut?”, ka pyetur Veliaj në sallë, duke thënë se sulmet e Berishës nuk u konsideruan prova të reja.

“Keni sjell “prova të reja”, kërkoj të sillni kamerat dhe kjo seancë të jetë e hapur për median. Silllni mediat që t’i deklaroj publikisht edhe para tyre përgjimet e kryera ndaj meje. Nuk kam asnjë sekret në bisedat e telefonike me familjarët e mi nga kabina burgut. Më izoluat 1 muaj në burg që të gjenit “prova të reja. Saliu e ofendoi SPAK dhe e akuzoi si organizatë kriminale, çfarë e gjeti? Pse nuk u konsideruan prova të reja sulmet e Berishës ndaj SPAK?”, ka thënë Veliaj.

Seanca për rivlerësimin e masës së sigurisë për Kryebashkiakun Veliaj nisi të martën në orën 10:00 dhe zgjati rreth 7 orë. Ndërkohë vijimi i seancës u shty duke i dhënë kohë avokatëve mbrojtës të Veliajt të njiheshin me provat e reja të paraqitura nga SPAK.

Mbrojta e Veliajt dhe e biznesmenit në burg, Elman Abule kanë kërkuar masë më të lehtë sigurie kundrejt garancisë pasurore.

Ndërkohë, avokatët mbrojtës të tre biznesmenëve Shkëlqim Fusha, Gentian Sulës dhe Meriman Palushit, kanë kërkuar heqjen e masës detyrim paraqitjeje, me argumentin se nuk është në nivelin e standardit ligjor, pasi sipas tyre provat nuk janë të mjaftueshme. Të tre akuzohen për korrupsion aktiv.

Masën e sigurisë nuk e ka ankimuar në Apel, Ajola Xoxa, Sokol Kryeziu dhe Fatmir Bektashi.

Kryebashkiaku Veliaj mbahet në qeli që prej 10 shkurtit dhe akuzohet për veprat penale “Korrupsion pasiv” dhe “Pastrim parash”, të kryer në bashkëpunim me bashkëshorten e tij Ajola Xoxa, e cila po hetohet në masë detyrim paraqitje, edhe për mosdeklarim pasurie.