Presidentja e Kosovës, Vjosa Osmani ka konfirmuar se Kosova është e gatshme që të mbajë zgjedhje të reja në veri të vendit, raporton Radio Evropa e Lirë. Kjo deklaratë vjen pas kërkesës së bërë ditën e sotme nga presidenti francez, Emmanuel Macron dhe kancelari gjerman, Olaf Scholz.

“Unë thashë që jemi të gatshëm ta shqyrtojmë këtë mundësi”, tha Osmani. “Ata kërkuan nga Kosova që të gjejë një mënyrë për të mbajtur zgjedhje të reja në veri që do tu jepte qytetarëve serbë mundësinë që të marrin pjesë dhe të zgjedhin kryetarë me legjitimitet më të madh”, shtoi Osmani.

Osmani theksoi se organizimin e zgjedhjeve të reja e lejon rregullimi ligjor i Kosovës dhe kjo mund të bëhet përmes një peticioni që mund ta inicojnë qytetarët serbë të komunave veriore.

“Kjo nënkupton që qytetarët serbë, pra rreth 20 për qind prej tyre që janë në listën votuese mund të nënshkruajnë një peticion dhe përmes tij mund të iniciojnë procesin e zgjedhjeve të reja. Ne jemi të gatshëm ta ndjekim ligjin”, deklaroi mes të tjerash presidentja Osmani