Shefja e politikës së jashtme të Bashkimit Evropian, Kaja Kallas, ka paralajmëruar një paketë të re sanksionesh ndaj Rusisë, e cila, sipas saj, do të jetë më ambiciozja që nga fillimi i luftës në Ukrainë.

Në një intervistë për gazetën gjermane “Die Welt”, Kallas tha se gjatë vjeshtës do të propozojë një listë të re masash që synojnë të zgjerojnë ndjeshëm numrin e subjekteve ruse të përfshira në regjimin e sanksioneve të BE-së.

“Këtë vjeshtë, unë po propozoj listën më ambicioze të sanksioneve që nga fillimi i luftës. Pasi të miratohen, këto masa do ta rrisin menjëherë numrin e përgjithshëm të subjekteve ruse që i nënshtrohen sanksioneve me një të tretën”, deklaroi Kallas.

Sipas përfaqësueses së lartë të BE-së për Politikën e Jashtme dhe Sigurinë, sanksionet e vendosura që prej pushtimit rus të Ukrainës në shkurt të vitit 2022 kanë shkaktuar kosto të konsiderueshme për Moskën.

Kallas pretendon se masat e BE-së i kanë kushtuar Rusisë më shumë se një trilion euro, duke kufizuar burimet në dispozicion të makinës së saj të luftës.

Paketa e re pritet të zgjerojë më tej presionin ekonomik dhe financiar ndaj subjekteve ruse, në një kohë kur Bashkimi Evropian vazhdon të kërkojë mënyra për të dobësuar kapacitetet e Moskës për të financuar luftën në Ukrainë.

Propozimi i Kallas do të duhet të miratohet nga shtetet anëtare të Bashkimit Evropian përpara se masat e reja të hyjnë në fuqi.