KOMENT/

Polica e Shtetit me urdhër të Prokurorisë së Posaçme (SPAK), mëngjesin e 19 majit ka nisur një aksion në disa qytete të vendit. Konkretisht janë 32 urdhër arreste për krime të rënda dhe krim të organizuar.

Mes të arrestuarve është dhëndri i ish-kryebashkiakut të Elbasanit, Sokol Sanxhaktarin. Ndërsa urdhër arrest ka edhe për Suel Çelën. Këta akozohen si koka të grupeve të ndryshme kriminale.

Aksioni i SPAK po zhvillohet në bashkëpunim me Forcat e Ndërhyrjes së Shpejte dhe Renea-s.

Ky aksion ka ardhur pas rrëfimit të Nuredin Dumanit – i arrestuar më 29 mars të këtij viti. Dumani ishte një nga personazhet më të kërkuara të botës së krimit.

Ai ka qenë i përfshirë edhe në ngjarjen e 9 prillit 2019, kur në pistën e aeroportit të Rinasit u vodh një shumë e madhe parash që po ngarkoheshin në avion. Sakaq ai akuzohet si personi, që ka vrarë Bujar Çelën, vëllain e Talo Çelës.

Ky i fundit është i shpallur në kërkim ndërkombëtar. Akuzohet për vrasjen e dy vëllezërve, Viktor dhe Besmir Haxhia.

Nuredin Dumani ka qenë pjesë e grupit kriminal të Talo Çelës. Por pas vrasjen të vëllait të këtij të fundit ata u bënë rivalë.