Në këtë përfundim mbërriti në fund të vizitës së tij në Tiranë, zyrtari i lartë i Departamentit të Shtetit, Matthew Palmer.

Ditën e dytë të vizitës në Tiranë zëvendës ndihmës sekretari amerikan i shtetit Metthju Palmer e ka nisur me një bashkëbisedim me gazetarë.

Në këtë takim ai theksoi se të gjitha partitë politike duhet të marrin pjesë në zgjedhjet e ardhshme.

Opozita duhet të përfshihet në dialog për reformën zgjedhore, tha Palmer

Një tjetër çështje e diskutuar ishte edhe kërkesa e opozitës për qeveri tranzitore. Palmer u shpreh se: “Qeveria dhe Parlamenti janë legjitime dhe Shqipëria i ka të gjitha mundësitë për të çuar përpara Reformën në Drejtësi”.

Më tej ai ka shtuar se është detyrë e opozitës të bindë elektoratin që të vijë në pushtet nëpërmjet votës.

“Jo detyrë e qeverisë të bindë opozitën të hyjë në zgjedhje. Kjo është një e drejtë ekskluzive që duhet ta vendosë opozita”, deklaroi ai.

Ai u pyet edhe për lobimin kundër të nominuarës për ambasadore të SHBA në Shqipëri, Kathleen Ann Kavalec.

Palmer ka dhënë një përgjigje interesante, ai tha se lobimi në SHBA është legjitim dhe se për këtë çështje ka edhe një hetim.

Zëvendës ndihmës sekretari amerikan i shtetit Metthew Palmer, foli edhe për çështje që lidhen me Kosovën, duke theksuar se duhet patjetër një marrëveshje mes Prishtinës dhe Beogradit.

Zv/ ndihmës sekretari i Shtetit, Matthew Palmer, në kuadër të ditës së dytë të vizitës së tij, do të takohet sot me Presidenti Ilir Meta dhe krerët e opozitës.

Dje ai u takua me kryeministrin Rama, takim i cili zgjati rreth 100 minuta në Kryeministri.

Pas takimit, kryeministri Rama shkroi në twitter duke e cilësuar si një takim të frytshëm si dhe duke zbuluar temat për të cilat u diskutua.

“Marrëdhëniet e shkëlqyera bilaterale, integrimi europian i Shqipërisë, dialogu Kosovë-Serbi dhe situata politike në vend, në një bashkëbisedim të frytshëm që na gjeti në dakordësi të plotë me zv/Ndihmës Sekretarin e Shtetit, Mathew Palmer” shkroi Rama.

Zyrtari i lartë Departamentit Amerikan të Shtetit, pas Shqipërisë do të vizitojë edhe vendet e tjera të Ballkanit.

Veritas.com.al/